Е.Стрельникова Марий Турек район Аимке ялыште шочын-кушкын. «Йорлын иленна. Ешыште шым икшыве лийынна. Мый кугуракше улам. Ача ден авам ӱмырышт мучко колхозышто пашам ыштеныт. Авам Анастасия Константиновна пеҥгыде койыш-шоктышан, осалат, манаш лиеш, ыле. Но икшывыже-влакым чын илаш туныктен. Изиэм годым ала-кӧн тасмажым шолыштынам да пареҥге пакчаште шылтенам. Авам тидым пален налын да почкалтыш дене логалтен. Тылеч вара нигунам тыгай осал пашам ыштен омыл. А ачам Алексей Матвеевич пушкыдо кумылан, весела пӧръеҥ лийын. Гармонь, шӱвыр дене устан шоктен. Карт дене мужедеш ыле. Тудын деке тора вел гычат коштыныт. Ик ганат оксам налын огыл. Еҥ-влак тидым паленыт да ӱйым, торыкым, киндым кондат ыле. Ачам мужедын гынат, Юмылан ӱшанен.
Ончыч йоча-влак кугурак-шамычлан колхоз пашаште полшен шогеныт. Ме шудым удыраш, кӱтӱм кӱташ коштынна. Изинек мураш йӧратенам. Вӱдлан памашыш волем, я чодыраш емыж-саскам погаш каем, я эше иктаж-могай пашам ыштем да «Эҥер вӱд ӱмбалне», тыгак Роза Рыбакован мурыжо-влакым мурем. Пошкудо-влак колыт да «Лизук, пеш сылнын мурет. Артистлан каяшет кӱлеш», маныт ыле.
Кандаш классым Марий Купто школышто тунемынам. А вара кок классым – Марий Турек школышто. Школысо мероприятийлаште чӱчкыдын муренам. Туныктышо-влак почеламутым, сочиненийым, ойлымашым лудаш эреак класс ончыко луктыныт, диктор лийын кертам ойленыт. Поэзийым пеш йӧратем, шкежат изиш возкаленам. Кӱчык почеламутем-влак «Ямде лий» газетыште савыкталтыныт. Лачак йоча газет гоч Звенигово район гыч Света лӱман ӱдыр дене палыме лийынам. Стихше-влакым «Ямде лийыште» ужмеке, тудлан серышым возенам ыле. Света мыланем вашештен. Но кок серыш деч вара кыл кӱрлын. Тудым вашлияш эре шонем, да ны ачалӱмжым, ны кушто илымыжым ом пале.
Марла кушташ йӧратенам. Кандашымше класс деч вара Йошкар-Оласе культпросветучилищыш (кызыт И.С.Палантай лӱмеш тӱвыра да сымыктыш колледж) куштымаш пӧлкаш тунемаш пурынем ыле, но кертын омыл. А Марий Турек школым тунем пытарымеке, 13-шо №-ан ПТУ-што контролерлан ик ий тунемынам. Налме профессием дене Йошкар-Оласе «Электроавтоматика» заводышто пел ий ыштенам. Артистке лияш шонымашем йоча пагытыште кодын манын шоненам. Икана «Марийская правда» газетыште Курчак театрыш самырык актер-влакым погымо шотышто увертарымашым ужынам. Тушко каенам. Мый дечем южышто Курчак театр шомакым «возаш» йодыныт. Ынде 1976 ий годсек тыште пашам ыштем», - манеш артистке.
Шуко модмо геройжо шкеж гай
Елизавета Алексеевна чыла рольым устан модеш. Но поро, весела койыш-шоктышан герой-влак чонжылан утларак лишыл улыт. «Икымше ролем теле нерген спектакльыште «илыше» планыште Дворник роль лийшаш ыле. Но мый ты образым чоҥен моштен омыл. Режиссер Михаил Шумилин тунам Лум пырчым модаш ойлыш. Курчак дене модаш ятыр жап тунемынам. Ончыч вет курчак-влак ала-мыняр пачаш кугу да неле лийыныт. Нуным вуй ӱмбалне кучен, кид вашке ноя ыле. Но эркын тунемалтын.
Гастроль дене пеш чӱчкыдын коштынна. Тӱрлӧ историй-влак лиеденыт. Икана телым Какшанмучаш села гыч У Торъялыш машина дене кудалынна. Корным поран петырен. Машинана пижеш, ме шӱкаш лектына. Тыге иктаж ныл гана лийын. Чылан кылмен пытенна, юбко урвалтыште ийсӱс кечен. Теве тыгай романтике ончыч лийын. Театр илыш нерген возаш шукертсек шонен коштам да жапым муын ом керт. Ала лишыл жапыште ты пашалан пижамат.
Йӧратыме ролем-влак: «Колобок» спектакльыште Рывыж, «Серебряное копытце» спектакльыште Пирысиге, «Теремок» спектакльыште Ужава, «Приключение поросенка Фунтика» спектакльыште Беладонна ӱдырамаш. Героем-влак койыш-шоктышышт дене мыйын гай улыт: весела, илышлан куаныше, мураш йӧратыше. Тынар ий Курчак театрыште ыштем, но кажне спектакльыште пуйто икымше гана модам, героем-влакым у могыр гыч ужам», — ойла Е.Стрельникова.
Театрыште лийме кажне кече пиалан
Елизавета Алексеевнам кок икшывыже, кум уныкаже куандарат. «ӱдыр ден эргым театрыш изинек коштыныт, тыштак кушкыныт, манаш лиеш. «Теремок» спектакльым ончаш йӧратеныт. Кажне постановко, актер-влакын модмышт нерген шонымашыштым ойлат ыле. Икшывем-влак ешан улыт. Нуно ынде посна илат. Мӧҥгыштӧ 15 ияш Мышка пырысем уло. Пеш ушан. Кажне кечын мыйым вашлиеш.
Театр деч посна ик кечат илен ом керт, тудо юж гай кӱлеш. Театр мыланем, чынжымак, уло илышем. Тудо мылам вийым пуа», - каласыш артистке.
