25 февральыште Курчак театрысе изи залыште “Кутко сӱан” спектакль ончыкталтын. Режиссёржо – РМЭ-н сулло артистше Александр Сильвестров, а художник-постановщикше – Роза Паткиева.
“Тиде шкешотан спектакль-урок. Артист-влак марла ойлат, руш йоча-влак умылышт манын, южо шомакым руш йылмыш кусарат. Мый художник-постановщик семын кеҥежымак спектакльлан декорацийым шонаш тӱҥалынам. Эн ончыч марий сӱан нерген шуко материалым лудынам. Вара пашалан пижынам. Артист-влакат спектакльлан кыртмен ямдылалтыныт. Ты спектакльыште кандаш артист модеш. Каласыман: “Кутко сӱаным” Пет Першутын поэме-йомакше негызеш шындыме. Пьесым РМЭ-н калык артистше Зинаида Долгова возен. Спектакльыште ятыр сылне сем йоҥга. Нуным композитор Григорий Архипов возен.
Марий калыкын тӱвыраже, йӱлаже поян да оҥай. Марий сӱан поснак ойыртемалтше. Йоча спектакль гоч тидым ончыкташ тыршенна. Марий тамга-влак декорацийым сылнештарат. Нунын мом ончыктымыштым йоча-шамычлан артист-влак умылтарат. Мутлан, Шочынава – еш символ, имне – паша, лыве – йӧратымаш. Марий калык ожно ик еш гай пашам ыштеныт, каненыт. Тидымат спектакльыште ончыктена. Курчак-влакна сылне марий вургеман улыт. Ӱшанена: “Кутко сӱан” спектакльын ӱмыржӧ кужу лиеш”, - ойла Р.Паткиева.
Спектакльыште ик эн тӱҥ рольым РМЭ-н калык артистше Эльвира Лисицына модеш. “Мый оръеҥ улам. Ожно ӱдыр, вуеш шумекыже, пучым пуалтен. Спектакльыште тидым ончыктена. Такшым “Кутко сӱаныште” артист-влак шкеак ятыр семӱзгар дене: шиялтыш, тӱмыр, гармонь, шӱвыр - шоктат. Пеш оҥай постановко. Тудо йӱланам аралаш, пагалаш туныкта. Ме шукертак марий спектакльым шынден огынал. Тачысе кечым тудын угыч шочмо кечыжлан шотлаш лиеш. Ончыкшым “Кутко сӱаным” районласе тӱвыра пӧртлаште да, очыни, школлаштат ончыктена”, - манеш Э.Лисицына.
Спектакль чынжымак оҥай, шонаш таратыше, туныктышо. Изи зал шыҥ темын.
Курчак театрын сайтше гыч налме фото.
Статьян авторжо Анастасия Эманова
