Шукерте огыл Курчак театрыште “Кутко сӱан” спектакль ончыкталте. Тушто самырык ӱдыр Ольга Лукьянова ик шудышырчыкым модеш, флейте дене мастарын шокта. Марий ӱдырак манын шоналтышым, кажне шомакшым раш да акцент деч посна ойла. А тудо руш пӧръеҥын да немыч ӱдырамашын шочшышт улмаш.
Оля Волгоград область Камышин район Петров Вал олаште шочын. Изинек – корнышто, манаш лиеш. “Ачам – руш, а авам – немыч. Чаманен каласыман, Германийыште иканат лийын омыл, тушто илыше родо-влак денат кылна йомын. Ньога улмем годым ачам ден авам ойырленыт. Ме авам дене Татарстан Республик Бавлинский районысо Александровка селаш илаш кусненна. Икмыняр жап гыч Бавлы олаште илаш тӱҥалынна. Туштак икымше классыш каенам, тыгак музык школысо хореографий пӧлкаш коштынам да тӱрлӧ семӱзгар дене шокташ тунемынам. Школ деч вара Башкирийысе Октябрьский олаш илаш кусненна.
А 2010 ийыште Озаҥысе театральный училищыш драме артисткылан тунемаш пуренам, - мут мундыражым рончаш тӱҥале О.Лукьянова. - Училищыште келшыме йолташем тунемын, тудыжо Йошкар-Ола гыч, кызыт армийыште. Ӱмаште дипломым налмеке, йолташем дене Йошкар-Олаш толынна, мыланем пашам кычалынна. Эн ончыч Константинов лӱмеш академический руш драме театрыш пашаш пураш шоненам, но налын огытыл. Вара Марий самырык театрыш толынам ыле, туштат вер лийын огыл. Тунам эше Курчак театр у полатыш куснен шуктен огыл ыле. Театрыште Алексей Анатольевич Ямаевым вашлийынна. Тудо пашашт нерген каласкален. Мыланем оҥайын чучын. Тыге июль гыч курчак театрыште пашам ышташ тӱҥалынам. Коллектив шокшын вашлийын. Драме артист дене таҥастарымаште Курчак театрыште пашам ышташ моткоч неле. Тыште эн тӱҥжӧ – технике. Репетицийыште чыла шот дене от ыште гын, сценыште кеч-кузе койыш-шоктышетым ончыкташ тыршет гынат, модмаш кӱчымӧ лиеш. Вет курчак мастарын кидыштыже веле илана. Садлан мастарлыкым кажне кечын вияҥдаш тыршенам. Коллектив поро, умылышо. Мыланем тӱрлӧ каҥаш дене полшен, поснак - артист Максим Белецкий. Тудо курчак дене образым почын пуымаште нюанс манмым умылтарен. Эн ончыч, конешне, неле лийын. Лу минут курчакым кучымеке, кид ноя да чытыраш тӱҥалеш ыле. Иканаште нимолан тунемаш огеш лий, тидлан жап да чытыш кӱлыт. Мый кажне кечын Курчак театрын артистше профессий нерген мом-гынат уым пален налам”.
Ольган ты театрыште икымше рольжо “Бука” спектакльыште лийын. Тушто тудо Маскам модын. “Икымше тӱҥ ролем “Щелкунчик” спектакльыште ыле. Тушто Щелкунчикым мушо ӱдырым – Мариям – модынам, - манеш артистке. - “Кутко сӱан” спектакльым ик эн йӧратыме постановкылан шотлем. Марла мутланымаште кугу нелылыкшым шижын омыл. Содыки йоча пагытем татар ялыште эртен. А татар йылмын, мыйын шонымаште, марий йылме дене шуко икгайлыкше уло. Спектакльыште мый флейте дене шоктенам. Огыда ӱшане докан, но тиде чын: изиэм годым тыгай спектакльыште моднем ыле, кушто мый флейте дене шокташ тӱҥалам. Ынде шонымашем шукталтын.
Ты марий спектакль пеш оҥай. Тудо калыкын йӱлажым аралаш туныкта. Декораций, марий сем, муро, костюм постановкыш шкешотан шӱлышым пуртат.
Кызыт “Панночка” спектакльым шындаш ямдылалтына. Тудым 26 мартыште ончыктена. Спектакльын режиссёржо - Олык Ипай лӱмеш премийын лауреатше, РМЭ искусствын сулло пашаеҥже Татьяна Лядова”.
Кажне артистын, очыни, модаш шонымо рольжо уло. Ольга Лукьянова Леонид Зоринын “Варшавская мелодия” пьесыж почеш шындыме спектакльыште Геленам моднеже. “Тиде произведений келге шонымашан, шонаш таратыше. Тудо йӧратымаш нерген. Кугу Отечественный сар деч вара лийше событий нерген сюжет. Руш рвезе поляк ӱдырым йӧратен шында. Но указ почеш, совет граждан-влак йот элласе ӱдыр-каче дене ешым чумырен кертын огытыл. Тиде произведений йӧратымашын вийжым почын пуа”, - ойла О.Лукьянова.
Самырык артистке курчак театрыште ӱмаште кеҥежым пашам ышташ тӱҥалын. Тиде жапыште шуко спектакльыште модын огыл, эн ончыч изирак роль лийыныт гын, пытартыш жапыште тӱҥ роль-влакымат модаш ӱшанат. Чоҥымо образше-влак шарнымашеш кодышт манын, вийжым ок чамане, кыртмен тырша.
Тоштерыште - 80 утла курчак
Ӱмаште ноябрьыште Курчак театрын тоштерже почылтын. Экспозиций поян: 80 утла курчак, театрыште тыршыше еҥ-влак нерген ятыр материал, фото, макет улыт. Тыгак курчакын историйже нерген презентаций ончыкталтеш. Театрын курчак фондшо кажне кечын манме гаяк ешаралтеш.
Ӱмаште Курчак театр “Путешествие в сказку с Оле ЛУКОЙЕ” проект дене “ЛУКОЙЛ” ОАО-н грантшым сеҥен налын. Садлан тоштерыште экскурсийым йомакче Оле Лукойе эртара. Курчак-влак нерген каласкала, нунын авторышт дене палдара.
“Ынде театрыштына спектакльым веле огыл, тыгак тоштерым ончаш лиеш. Экспозиций оҥай. Икшыве йомак тӱняш логалже манын кыртмен тыршена. Курчакым ыштыме мастер-класс-влакым эртарена. А ончыкшым тоштерыште фотогалерейым ышташ шонена.
Марий Элысе Курчак театрын историйже 1942 ий гыч тӱҥалеш. Ятыр актёр, художник, композитор тыршеныт. Мутлан, художник Михаил Александрович Котенов шке жапыштыже Москошто Образцов лӱмеш курчак театрыште пашам ыштен. Конструктор Павел Дмитриевич Матвеев кугу пашам шуктен шоген. Тудо Кугу Отечественный сарыште лийын, пел йолан пӧртылын. Йоча-влакым композитор Вениамин Александрович Захаров музыкшо дене сымыстарен. Фото гоч нунын нерген палдараш кӱлешак, шонем, - манеш театрын тӱҥ художникше, РФ тӱвыран сулло пашаеҥже Людмила Иванова. - Тошто курчакна кызытсе дене таҥастарымаште моткоч ойыртемалтеш, тугаяк оҥай да сылне, но кугурак да нелырак улыт. Ятыр курчакым реставрироватлыме. Курчакым ышташ куштылго огыл. Художник образ могай лийшашым ужын моштышаш. Тудым эн ончыч сӱретлыман, вара ышташ тӱҥалаш лиеш. Курчак-влак тӱрлӧ лийыт: марионетке, куэм гыч ыштыме, планшетный да тулеч молат, садлан курчакым ямдылыме йӧнат тӱрлӧ. Ожно шун гыч утларак ыштена ыле. Йӱдлан тудым вӱд дене варен кодымо. Оварген але укем эскерыме. Шун келшыше ненчан огыл гын, угыч вӱдым ешарен, полиэтилен пакет дене леведын, йӱдлан кодымо. Ме Изи Какшан сер гыч шуным кӱнчен кондена ыле. Курчакым ыштыме паша шкешотан ритуалла чучын. Кызыт шуным огыл, а гипсым, пластилиным, картоным, писте материалым утларак кучылтына. Курчак спектакльым веле огыл, тыгак илыше планан постановкымат ончыктена, садлан ятыр оҥай костюмым ургена.
Кажне спектакль молан-гынат туныктышаш, а йоча-влаклан йомак эн ончычак - порылыклан. Тоштерыштына “Снежная королева” постановкылан посна верым ойырымо. Кызыт ты спектакль репертуарыштына уке. Туге гынат мый тудым ик эн виянлан шотлем, вет икшыве шкет лийшаш огыл манме нерген ойла. Ача-ава-влак карьерылан огыл, а йочаштлан жапыштым ойырышаш улыт. Шукыж годым ньогам ондакак ясльыш пуаш тыршат, вара йочасадыш колтат. Икшыве пиалан кушшо манын, тудын тургыжланымашыжым умылаш тунемман. Уке гын Снежная королева гай еҥ-влак йоча чоным кылмыктат. Герда гай утарыше, полыш кидым шуйышо йолташ-влак шукырак лийыт гын, илышат саемеш”.
Кызыт тоштерыште МарГУ-н преподавательже Валентина Антышеван персональный выставкыжлан посна верым ойырымо. Тӱрлӧ костюман 22 курчак шинчам йымыктара. “Кум ий ончыч тудлан шочмо кечыжлан фарфор курчакым пӧлекленыт. Валентина Антышеван курчаклан у костюмым ургаш шонымашыже лектын. Тиде паша тудым моткоч чот сымыстарен. Родыжо, палымыже-влак, тудын чон кумыл пашаж нерген пален налмеке, кажне пайремлан манме гаяк курчакым пӧлекленыт. Кызыт коллекцийыштыже 22 курчак уло утларакше фарфор гыч ыштыме. Курчак-влакым шукыж годым Америке гыч кондымо. Нунын шке паспортышт уло. Выставке 1 апрель марте шуйна, - ойла театрын маркетинг да рекламе шотышто специалистше Ирина Тимонина.
21 мартыште театрыште Кукольникын кечыжым палемдат. Артист-влак тӱрлӧ оҥай мероприятийым ямдыленыт. Мастер-класс-влак, тӱрлӧ модыш лийыт. “Царевна лягушка” спектакльым ончыктат. А сылне костюмым чиен толшо ӱдыр-рвезе-влаклан пӧлек пуалтеш.
