"Йошкар-Оласе Курчак театр ятыр ий (1942 ийыште шочын) кажне кечын гаяк йоча ден ача-ава-влаклан онай деч онай спектакль-влакым ончыкта. Икшывым юзо тўня дене палдара, а кугын-влакым кеч жаплан йоча пагытыш пєртылта. Шекланенда, талантан артистын кидыштыже кузе курчак ылыжеш, чонан лиеш. Тунам пуйто жап шогалеш, нелылык, тургыжландарыше йодыш-влак мондалтыт. Чыла тўткыш лач сценысе курчак деке. Теве могай лийшаш чын искусство.
Курчак театрын репертуарже кумда. Йомакым веле огыл ончыктат, тыгак кызытсе илышлан келшыше спектакль-влакым ямдылат. А тенийсе тургым йоча-влакым мо дене куандара? Тидын нерген тўн режиссер А.А.Ямаев (снимкыште) дене кутырышна.
- 1 сентябрьыште театрын 73-шо тургымжо Артем Макеевын пьесыж почеш шындыме «Курочка Ряба» спектакль дене почылтын. Тудым ме У ий каныш кечылаштат ончыкташ тўналына, - манеш Алексей Анатольевич. - Такшым тенийсе тургым постановкылан поян. Теве шукерте огыл коллективышкына Марий Элын сулло артистше Александр Сильвестров ушнен. Тудо Михаил Супонинын пьесыж негызеш «Бука» спектакльым шынден.
Театрыштына у вий пашам ышташ тўналын. Тўвыра да сымыктыш колледжыште артист-кукловод специальность дене Марий Элын калык артисткыже Галина Владимировна Ковалеван вўдымє курс гыч выпускник-влак мемнан деке пашам ышташ толыныт. Тидыже моткоч куандара.
Курчак театрнан артистше-влак ятыр фестивальыште мастарлыкыштым ончыктат."